pocalo je pocalo...

U Škrabonje sam uzela pakpapira, hamera kako bi se moderno izrazila, jer mi triba za slikat.
A nisan slikala još od škule!
Zaboravila san kako se pinelić drži! Kako se boje mišaju!

Najprije san ka dite, paričala botijicu sa vodon, mići pinelić i tri tube tempere.....

A onda san, da bi namestila 6,5 (šest i pol) kvadrati karte, morala maknut svas namještaj od kužine!
Srića da je ded Fabe bi dobar da rodbinon pa su još njemu ostavili lipu kvadraturu, tako da sad i ja iman di slikivat toliku sliku!

Rekla mi je Vesna Šimunka neka nikomu ne govorin, pa moran mucat, ali isto, vajda bi pukla da ne recen dvi tri besede: Slikan pejzaž za karnevalski tejatar!
Vražji pejzaž je to, od 6 i pol kvadrata!
Ko ne dojdete u kino, nećete ga vidit. Pa sad kako oćete :)

Nego, ovo je samo uvod u radne akcije po kinu koje se svake godine ponavljaju. I nikako se ne možemo načudit od kud se toliko smeća skupi u ono jadno kino.

Pa ako je neki i zaboravi, evo da ga sitin na naš proglas. Jedino van moran reč da smo preminili ime firme. Sad smo NRU ''Meten-meten''. Ime je zaštićeno kod odgovarajućih organa pa ga i ne provivajte ukrast. Ko imate viška munite, otvorit ćemo i žiro-račun za donacije.

Poštovani korisnici prostorija Doma kulture - kina Jadran:
Građani, osnovna i srednja škola, izborne komisije, HDZ-ovci, SDP-ovci, Gongovci, HSP-ovci i ostali - ovci:

Već skoro deset godišć smo u vašoj službi; u sjeni, nečujni i neprimjetni ali svakako konstruktivni i trpeći.
Naše metle i škovacere…..
naše vrićice od smeća…..
naši kablići, pineli i klamarice…..
naši pakpapiri, selotejpi, brukve, kišća i konopi…..
uvik su bili u vašoj službi – nepriznati!
Naše pluća su pune prašine od iza bine, naši su nokti cerni od ostavjenoga smeća u katabužicu pod škale.
Jeftina keramika i pojidene četke od kondotov jedva trpiju vašu drisku, čike i najlonići od papirnatih facolićov.

Kino ne cisti komunalno poduzeće, niti čistačice sa plaćon od državnih proračuna.
Kino ne cisti - ni općina - ni radijo, - ni turistička zajenica - ni centar za kulturu.
Kino za vamin cistimo MI!

I zato vas molimo, da u ovo korizmeno doba promislite i odreknete se zauvik ostavjanja svoga smeća po kinu.
Zaboravite na sram od držanja metle da vas ki ne vidi.
Zaboravite da će van ki to stit platit - jerbo ni namin niki niš ne placa šoldiman.
Naša plaća je vaš smih i veseje kad dojdete u naše karnevalsko kino.
Naša plaća je moć radit sa Brankon!
Destak-dvajset grintavih judi i mi s njiman, za Branka!
Ni vaše smeće, ni vaša bruntulanja nisu nan pokvarili veseje ca smo mogli sve ove godišća radit sa takovin covikon!

Naš mali TIM van svima želi da OSTVARITE SVOJE SNOVE, da nastavimo našu KARNEVALSKU tradiciju i da svi zajedno IDEMO DALJE!
Za uvik vaši;
TRIO Fi sa suradnicima.