14 veljače 2016

Karnevale dobro moje

U skladu sa svojin djelatnostiman, članovi karnevalske udruge tri godine za redon, tri zadnja karnevalska cetvrtka hodili smo u ričavac. 
To je stara paška tradicija di maškarano društvo gre u kuće svojih prijateljov i ljubiteljov karnevala zapivat, malo zatancat, napit se po žmuj bevande, zagrist se frit ili cakod slanijega ca domaćin parića, malo se zabavit i onda partit daje kod drugoga prijatelja karnevala. Za poputninu, domaćin veselin gostiman da botiju vina, paketić bombonov, kobasicu, šaku fažola, dva-tri jaja, brašno... ca god oće. Pa lipo ako i neće. A takovih ni bilo, jer zna se kod koga se gre, ki voli da mu se gre i ki voli karneval. (Ako smo koga preskocili, neka ne zamiri jer ni naša krivica. Ne more se kod svih stić u samo dvi-tri ure od leroja).
ovako su  nas docekali svi kod kih smo bili
Bilo je tako i vogodišće. Sobon smo uzeli i mlaju mulariju ka se voli maškarivat, kako bi in pokazali ca je pravi ričavac: da znaju da ričavac ni odit pogradu ka muha bez glave, sa velin najlonon uruku i nabijat redon po vratiman, a kad ki otvori vrata da bledo gedaju unjega cekajuć da in da šoldov, jer ako in da jaja onda mu ih tornaju inkartane u fasadu.
mularija
Ota naša mića dica brzo su se snašli. Naucili su kad se triba otkrit, koga se ne smi otkrit, zac se svi praviju da ne poznivaju toga ki se ne otkriva, kako se piva, kako se kola i kako uvik triba reć fala, bog i laku noć. Naucili su da društvo uvik ima samo jednoga ki vodi (vođu puta), jednoga ki zna sve pisme (onaj ki nosi harmoniku) i jednoga jedinoga koga oni moraju čuhat (načulit uši samo na taj jedan glas). Dica su pametna. Tako smo i vogodišće odili po kućamin prijatelja karnevala i za poputninu skupili lipoga materijala za pojist i popit. 
Nismo sve sami proždrli i popili, nego ste veći del svega toga, vi dragi Pažani i vaše žene, pojli i popili na pijacu, a manji del kobasic i vina odvojili smo kako bimo namirili vridnu omladinu ka je preuzela nasebe zadaću da nacini kavšu za našega Marka. 
Kobasice i vino su dobili kako ne bi bili gladni, da in ruke ne trepiju dok miriju daske i zabijaju brukve u kavšu. Imali su vrimena sve to pojist i popit kad god su stili. To ca in je kobasic ostalo, pa su ih pojli na cistu sridu, dan posta i nemrsa, to in ni kriva karnevalska udruga, niti je to naš problem. Omladina je odrasla, punoljetna, znaju ca ciniju, samostalno donosiju odluke. Na kraju krajeva, ako ćemo grubo: ca su doma naucili, to vanka ciniju, ne?
Ima jedna muna od covika ka je sve ovo našla komentirat i zamirat članoviman karnevalske udruge. Ne znan je triba plakat od muke, sa kakoviman smo okruženi ili samo mahnut rukon… Karnevale dobro moje.
naš Marko

Nema komentara: