01 listopada 2009

i druga banda medaje.................

Kako na BNB-u moj putopis ni moga izać ovako kako san ja stila, stavila san ga na blogić, pa koga je voja i koga zanima, da more vode vidit kako stvari zapravo stoiju........

Paška turistička ponuda – del 2. - GRINTANJE

Najprija da napomenen da se još nismo makli od stare ceste, rute nazvane ‘biciklistička staza broj 3 Stari grad – Košljun' jer ni lako okričat pedali potli dva godišća kauča. Oni pervi dva-tri dana bili su mi puno lipi. Bilo mi je kaj kinezu u Dubrovnik…kaj Fati u Importane…… A sad kad mi je biciklica već zapametila put i kad mi oci više ne gedaju 'u daljinu', zbudilo mi se je ono moje drugo ja, moje grintavo ja.
Modro-kafeno-belo-sivo-zelenu lipotu 'krajolika' pocale su smitat neke druge boje za ke nikako ne moremo reć da su prirodne lipote našega škoja. Znan ja da ima više versti 'grana umjetnosti' i da je sve stvar ošobe ka na svoj mod 'pošmatra' prostor okolo sebe, ali vode pišen ja, a ne neki tamo 'modernista' ilitiga nadriumjetnik, pa onda molin lipo.
Danas smo partili od našega mosta, uza Keruma i Olimpika, ispod svete Jelene prama Starome gradu.
Pari se da je gazdi Olimpika bilo malo kvadrature pa je svoj 'lounge bar' pojača sa još par 'sjedečih' mista.


Ca turisti misliju kad vidiju ovakovu jednu kadu i uza nje žute kante od….. (neznan ca je moglo bit nutra). Takovih kad je sve redon po ovome škoju. Ja i vi znamo cemu služiju, ali turisti…. Ne bi rekla. Pogotovo kad vidiju vakovu jednu, odma uza ceste. Za tu ni ja neznan ca tamo cini.

Odma uza nje, u vo malo mutnoga, plitkoga mora uza naše zapušćene soline, morete poznat nicigovi radijatori, auspuhi i bicikle, felge, gume…. Najlonići neću spominjat, jerbo da oni nisu smeće. Oni kaj nehotice doletiju od kontejnerov do sve redon…..





Ko bite stili kupamin napravit 'mozaik', dojdite karocon i ukrcajte – mukte.

Vozili smo se tako po vome lipome teplome jesenskome danu…. Jedan za sport, jedan za gušt, jedan za kalat malo sala….. a ja….. svako malo stajen i grintan.


Kad san vidila ovih

sitila san se da san dva covika vidila na nasip pod svetu Jelenu….. E, nacekat ćete se vi tamo, jerbo ovi dva znaju di se riba koti! (hmmmm ne znan ko se baš tako rece za ribu…..)


Ni on veli brig koga san morala proć, ni me umori toliko da oslipin i ne vidin još lipote:

Vo san notala… a onda san morala doć i bliže da vidin ka marka je to bila…da je ja ne kupin, jerbo ko njemu ni trajala……


Ovi rokeli od Elektre gnjiliju, a metar derv je 300 kun…….


Vode san morala stat.

Ucinlo mi se je da je vo nacrta kikod od CIMP-a. Trokut je daleko, a marsovci bi mogli svaki tren doć….pa da znaju di parkirat.


Celin puten pasivali smo uza necigovi zidi:







a ako ste se napili vode potli ubeda, pa vas je uvatilo baš vode…. - - nema straha: karte ima kakove oćete. Ova je malo tverja, ali bi isto poslužila…



Kad smo došli u Košin, muški su seli, a meni vrag ni da mira.

Pun žal 'fruti di mare'



I umisto da seden i pravin se da ne vidin ovo ca i vi sad vidite, ja san šla slikat, da sa vamin podilin ovu lipotu zamotanu u lenost i nemar. Lipa stara riva i na njoj lanterna. Reka bi covik – divota.



I bila bi divota kad bi svit ki koristi tu rivu ima malo više voje poredit za sobon.







Smitaju mi ovakove stvari ke nas sramotiju kod fureštoga svita. Ma isto, uza sve ove zibrane ružne slike, ne moren ne vidit lipotu moga škoja.

Kad smo se tornivali nazad, sunce je već zapadalo, kratki su dani. Kod Staroga grada uto doba morete vidit ove lipe drage beštije

A skoro san van zaboravila reč: i svi kamariži su se povačali! Vo van je nauka, da za drugi put znate da se po Bašaci ne badaju drace (akacije) niti sadiju đirami. Naš stup je kamariž, ki će rest i kad ga umore usadite.

3 komentara:

josip kaže...

onaj durex mi nesto poznat.
kad sam bio na plazi 08.08.09 je bio sjeverno-istocno od mog sugomana. izgleda da ga je neko pomjerao. hm. hm..

nije ni cudo sto sam nakon samo 24 ure oflekao obraz (hm tijelo)
al tko zna. da durex nije bio blizu sugomana mozda bi fleke bile jos gore. kolko tolko zasticuje.
da sam bar lego blize... ili dalje. tko ce to znat.

Ross kaže...

:) Mr. Fleki, velkam bek :)

Anonimno kaže...

thanx