01 lipnja 2009

kako god...

Toliko toga se je dogodilo uvu zadnju nediju dan, a moja reakcija na sve to je totalno prazna glava, štumak zalipjen za križa i žuj od novih postolov.
Reka mi je moj kumpanj; finila je i ova. Ka? - mislin se ja, jer me je jutros docekalo destak emajlov, par propušćenih poziva, neodgovoreni esemesi ….. Meni se pari da je sad tek pocalo. A ca? Neznan. Vidit ću pa ću znat reč.
Celo jutro čuhan neki judi kako drobiju o Pagu, o izboriman, čakulaju da ca ćeju, kako ćeju…. A niti jedan od njih nima prebivalište ni boravište u Pag. Ca njih briga kako nan je vode? Ca se oni imaju uplićat u to ca su pažani zibrali? Ca oni imaju kalkulirat kad smo mi sve već iskalkulirali, zazvali Majku božju od Staroga grada i ufamo se u onu staru: boje imat sriće nego onu stvar……. Sve nekakvi generali, proroci i babaroge. Strašiju me čaranjen i gedanjen u karte i kristalne boće. Udila san ja rozi u tašku, obukla san gaće napak i vezala cereni konac okolo noge, sve protiv urokov. Ko me ki urok dopade, mislin se, kako ću znat od ke bande je doša? Od live ili desne? Ca te briga, govori mi kumpanj, ne sekiraj se, za nediju dan, pol ih se neće sićat ca je reklo, a druga polovica će zaboravit da je opće ca rekla…i opet će svaki po svome batinat.

Nema komentara: