OOOOOO novitade, novitade

Danas san bila na jedno misto, na ko još nikad nisan bila: na sjednicu Skupštine karnevalske udruge ''Markova Kumpanija'' !

Istina, pošla san se samo prižentat, jerbo se je danas moje ime svečano spomenulo, ko novoga člana udruge. I svi su mi pleskali :) Je, ala, nisan bila sama. I Igor je za isto bi kaj i ja, samo san cula da su njega uzeli da pomladiju popovski ogranak udruge. Mene su danas i službeno potvrdili ko lektora za BNB.

Kako je teta Rajka nekoliko put, neznajuć za moju titulu, kalala barba Stipi Korenu da ne govori po paški, ja san je odma zanotala ko svoju suradnicu, da ne recen mentoricu, jerbo njezin je paški puno žveltiji od moga. Ona ne mora mislit kako će ca reč. Ja više put moran stat i promislit, a njoj je to kaj vodu pit.

Mogu van reč da mi je tamo bilo puno boje nego da san doma ostala gedat farmu uživo. Judi su veseli, sjednica je prošla jedan tren, svega su rekli i puno se dogovorili.

Ja san zapametila samo to da će se za 27.7. speć kolačov. Taj dan pocat će proslava 50. (pedesetoga) rođendana našeg litnjega karnevala.

Govorili su oni i o šoldima, o tome na ca su se potrošili šoldi od lani, kako su zadovoljni ili nezadovoljni sa napravjenin....

Svega.

Vo su van i dvi tri slike da vidite ki je bi tamo i da vidite kako su to ozbiljni ljudi.

Posvećeno jednoj budućoj paškoj nevisti

Kad si došla u kuću, ako te je buduća sekrva odma povela u komoru pokazat ti ormaruni puni dote, sigura si da joj se puno pijažaš. Ako te ni povela, onda niti neće, ali to ne znaći da joj se ne pijažaš. To samo znači da će te budnin oko pratit.

Ako ti budući svekar ponudi pit, nemoj uzest ispred buduće sekrve, ali zato moreš ako nje ni doma. Tako ćeš mu pokazat da ćeš uvik držat njegovu bandu. A onda si na konju, jer ko te svekar voli, bit će ti manja muka sa sekrvon. (ali to još uvik ne znači da muke nećeš imat)

Kad ti sekrva da uruke svu onu bjankariju, dotu ca je svomu sinu paričivala od prvoga dana kad je kuku i iglu uzela uruke, moraš znat da ti to ona ne daje zato da to bude tvoje.
To ti daje samo da ti cuvaš za svoju dicu, jerbo ako te vidi da si legla pod koltru, a dice još ni, nikad ti to neće zaboravit.

Ako ti ikad pade napamet rastavit se od muža, nedaj bog da njegovu dotu uzmeš sobon. Bit ćeš prokjeta zauvik.

Vo ti je samo kratki opis, da se znaš ravnat.

Izbori

Mislila san da još ne triba niš govorit.....
Mislila san da ću moć niš ne reč....ali san se prevarila.
Vajda bi pukla da moran mucat.
:)
Jedva cekan on dan kad ćeju se ugrad skupit judi ki ugrad malo kad greju.
Kad ćeju se prebuceni prižentat svaki na svoje glasačko misto, uzest olovku uruke, prekrižit se i zaokružit broj uskraj imena.
Ki je za koga? Ki će koga? Ki koga neće? Ki komu neda? Ki? Ca? Zac?....
Antroke kužina......

čistoća je pola zdravlja

Ovi dani je Komunalije najspominjanije poduzeće. Glavna novitada je da su se preselili, pa onda da su sve redon pobadali maćuhice, pa da su kupili novi kamijoni…..
Kad ih već spominjemo, ne bi bilo loše, a ja već odavno o tome mislin, napisat ELABORAT O NAČINU KORIŠĆENJA KONTEJNEROV.
Ja se sićan doba kad je barba Grgica odi traktoron, a moje obedvi nane su drcale na vangrada sa starin kantamin od late, punin smeća, da na ga vrime docekaju i da itiju smeće u traktor.
U to doba, ni bilo najlonićov kaj danas. Oni šuškavi od Trsta, su se cuvali i bili su samo za prižentivanje. Tad ni bilo vrićic od čipsa, uloškov sa kriliman, kor od banan i svega onoga drugoga ca danas cini floru i faunu oko kontejnerov…...
Moje nane su stale atento da bi docekale traktor, jerbo ko ne bi bile žvelte, traktor odeeeeee, a smeće osta do sutra gnjilit u konobu. Nisu ga itale po ulici. Nisu ga ostavjale po kantunima da smrdi drugoj susedi….. Tad se smeće ni ostavjalo kaj na pijat maškamin i galebiman.
Danas, kad imamo sve drugo – mi nimamo kulturu.
Danas, kad moremo u svako doba nakomodno poć itit smeće, namin je teško pretisnut oni dva cereni botuna, otvorit pokrov, itit smeće i potegnut pokrov nazad.
Mogla bi razumit moju staru susedu, ku ruke boliju, ka ne more visoko dizat kerumovu vrićicu punu smeća, ali ne mogu razumit sve ove mlaje, ca se oćeju gospoje i dame. (govorin o ženskamin jerbo, za reč pravo, samo one i itaju smeće. Muških je jaaaako malo).
Ne mogu razumit da in je toliko teško dignut pokrov i itit smeće unutra. Ne mogu razumit niti da su toliko plitke da neznaju da triba stisnut cereni botun. Pa za nekoga jarca taj botun tamo i stoji! Turni, stisni ga, vraže, provaj! Morebit ti prosvitli!
A ima ih i malo pametnijih, ke znaju otvorit, ali opet nisu toliko inteligentne da ga otvoriju širon, nego samo nagneju i itaju, itaju…..i sa destak vričic ''napuni'' se kontejner. Je, pari pun, MA SAMO SPRIDA!! Druga polovica mu je praaaaznaaaaaaaa………..

Puno bi mogla o ovome pisat. Puno primjera dat. Pa i imenovat ''ošobe'' ke bi tribalo poducit.
Molin Boga da naš portal prati kikod od Komunalij, pa da će, ako i kad pročita ovo malo mojih jutih slova, organizirat tečaj BRZO UCENJE – KAKO OTVARAT KONTEJNERI!
Bilo bi potribe i za tečajon CA ITAT U KI KONTEJNER, a one napredne, tribalo bi upisat večernju školu, smjer: SKUPI I ONO CA SU DRUGI ITILI. Ovaj bi se moga upisat u radnu knjižicu.

Molin Komunalije da razmotri moj prijedlog. A usput da oplemeni svoj rad i pobrine se da cereni botuni delaju, da pokrovi od kontejnerov ne zadivaju jedan za drugoga i da zidići odozad kontejnerov ne smitaju pokrovu da ga se otvori.

Ostajem, u nadi povoljnog rješenja.
RF

Osta centar bez još jednoga stanara....

Partili su komunalci pod novi krov. Lipa nova kuća, nova mobilja, sve novo.

Za njiman je ostala pusta zgrada stare tvornice konšerve, mrzli dimjak Kondićeve pekare, stara kovacija, Belanova stolarija... same uspomene na neko prošlo vrime.

Neće više bit komedijanja uzoru, sa renolima, limunikamin, kombijiman...

Neću više vidit carataniju penzjonerov ki su baren jedanput u sri lita ogorceni rivali šporki kontejner Pevaciću na vrata...

Partili su na Julovicu, dvajset minuti penzjonerskin korakon, nanoge od pijace. Ovo malo paškinj u fuštani, grintaju i pušeju, od kad su cule di komunalije gre. To in je dalekooooo.... da ki će gori hodit.....kako ćemo sad plaćat vodu.....od male penzje davat za proviziju...Ca nisu mogli ostavit kancelariju ugrad......

Nemojte nan svi bižat odgrada..... Ostavite baren bokun blagajne i reklamu dozgor vrat da znamo da smo Grad, a ne pusto selo, sa zaškurenin barkunima iza kih nima ki špijat ovo malo naroda ca je ostalo ugrad....